搵食

 小時侯，老豆叫我努力讀書。佢話，佢個年代（廿多年前），中學畢業就已經可以做銀行經理，所以讀書係好重要既。簡單D講，讀書等如有錢。

到我讀中學時，從其他人身上我知道，一定要做專業人士，不單只有收入，專業人士就等如高收入。所以呢，我就走去做專業人士。

踏足工作，社會上就大吹MBA風，無論乜鬼行業，D人都話要去讀返個MBA，讀完MBA就好似一定識管理（又唔見當年一街都係努資問題，咪一鬼樣），有MBA就好似有收入保證。

再過幾年，李超人就話，我讀到小學，但幫我打工既個個都係大學碩士博士。社會上，人人開始發現，學歷同搵錢或者你富身家係無直接關係，都唔知讀咁多為乜。

現在，所謂專業就更加提心吊膽，因為隨時比人告，專業人士個個都要買保險。

近來，新世代，買了幾個 bitcoins，炒幾炒，唔使一年，搵到既錢多個佢老豆退休時既資產總數。咁，咁努力做足幾十年儲足幾十年都唔夠新世代炒幾炒。

世界變，連搵錢既方法都不斷變，我呢類老鬼又憑什麼來教新一代搵錢呢？