前塵往事之辣椒油

今日同朋友吹水時講開辣椒油，即時引起我小時的辣椒油故事。
 
小時候住街市樓上。係呀，灣仔其中一個街市。講開又講，灣仔真係好多街市。我相信當時灣仔人口應該很多，加埋好多住係其他區既人都鍾意去灣仔買餸，我想應該係價廉物美。
 
街市與食物大排檔其實係形影不離，有街市就一定有食物大排檔，到現在都係。現在d多層街市都有一層係食市。肚餓？去搵街市就一定有野食。以前d大排檔就周街都係，不過都有pattern，通常係街市既街頭街尾，好少街中間。
 
大排檔開檔時間亦唔一樣。有d專做早市，呢類晨咁早就開爐，如粥檔，點心檔。零晨三點就開爐。在一片寧靜的環境開個火水爐，"噓噓"聲，你都咪話唔嘈（以前條街無咁多車，加上少人出夜街，入夜條街係可以好靜。另外大排檔火水爐既火力係唔野少，當然亦唔會有滅聲設計）。所有人都同我講，我一瞓著覺就算行雷或者大叫我都唔醒，我相信係自小比樓下大排檔訓練而成。
 
早檔通常做埋午市就收檔，兩點到三點。而一般做午市晚市的食檔就會遲少少開，呢類通常係麵檔，飯檔。而有一類係做到好夜做埋宵夜，就會再遲d先開檔，可能要去到十一點後。不過，我亦見過有一種檔口係由早做到晚，做足成日，但係呢類檔其實係由兩班人做，應該係share個檔口（都幾環保）。所以呢d檔好有趣，朝早同夜晚頭係買唔同既野食，例如早上買粥晚頭買飯。
 
講返辣椒油。我相信我一生中已經食過最好食既辣椒油。我唔係話全世界最好食而係我一生最好食。辣椒油係一個麵檔老板自製，佢既麵亦係一絶。佢個檔座落於春園街中間。我最鍾意係佢既魚蛋麵+辣椒油，簡直係一絶。當然，佢其他麵都好正，如雲呑麵等。不過唔知點解硬係覺得魚蛋加辣椒油係最正。
 
個老板唔係廣東人，可能係潮州又或者係北方佬。就係佢唔係廣東人，佢d辣椒油與別不同，其他檔食唔到。 好多大排檔既辣椒油都係買現成的，事實上一d都唔貴。所以d味都好standard，但麵鋪老板係自己煮辣椒油。每次佢一煮（大既一至兩星煮一次），成條街都香氣十足。當然唔受得既人就淚流滿面。落足材料，落足火候，全人手製作，簡直無得頂。
 
其實佢d野係咪咁正係無比較，但感情分已經贏晒。所謂好唔好係好主觀，但呢個唔係問題，反而呢個主觀感覺比我食過我認為最好食既野。 人就係咁有趣，有時唔好咁理性，扼下自己可以令到自己好快樂。
 
係大排檔食野仲有兩件事係我非常深刻的。第一，坐檔前櫈仔。以前d大排檔除咗有圓枱摺櫈外，係檔前通常都有一排櫈仔。要坐呢排櫈，你就一定要踎。點解好地地有櫈唔坐要踎櫈仔？原因好簡單，排櫈仔連往個檔，你踎係度時就即係坐係個煲同個爐前面。好處係：一，同老板最近距離接觸，傾偈。大家舊街坊，成日幫襯，都非常熟落，根本就好似朋友一樣。吹水傾心事，好自然既事。二，睇老板煮麵，睇人做野其實好好睇，由其係要手藝既工作。老板煮麵既手藝簡直係藝術，係化境，係一種武功。所以動作係完美既。好好睇。我吹水唔多，反而係老板搵我傾偈多，但我就最鍾意睇佢煮麵。三兩下手勢就一碗靚麵或者靚油菜，勁。三，暖。面對住火爐，係冬天食麵，除了口暖肚暖之外，腳也暖。試想想，北風係你背後吹，但前面係暖笠笠人間美食，加上同老板吹下水，真係人間幾許。
 
第二，洗筷子。呢家野真係唔應該流傳。話說以前d人去大排檔食野前好鍾意洗筷子，用熱水洗筷子。你當然認為好衛生，用熱水洗筷子有消毒殺菌作用嘛。其實以前d人衛生意識一d都唔差，自我保護能力高，食大排檔洗筷子，去茶樓會用熱茶洗碗洗筷子。反觀而家，去到就食，你邊有自己洗下d食具？你會話間食市會洗家嘛！我答你又無睇住佢點洗你又信佢洗得乾淨？自己做多少少用熱水洗過唔係安全d咩？ 自己洗筷子當然好d，但問題在於佢地用煮麵個煲水洗筷子呢，大家唔係攞d水出來洗筷子，而係放双筷子入煲水度洗，即係係人都食洗筷子水。試想想，你會唔會用洗碗水煮飯食呢？此風不可長。 後來進化到食市人比個玻璃碗你用來洗野，我覺得咁係最好。始終個句：食落自己個肚度，自己要小心為上。