武肺疫苗進化史

喺武漢肺炎經歷了已經兩年多，我希望係疫苗使用上有一個小總結，內容係關於“打唔打疫苗”的論據s

武漢肺炎剛剛開始的時候，市民就問一個問題：究竟有無疫苗？幾個月之後。就有幾隻疫苗跑咗出嚟。咁快就有疫苗本來好似係好事，但跟住大家就問：疫苗有無效？

疫苗有效數據，疫苗有冇副作用

喺呢個問題上，有部分藥廠就會講有幾多個percent係有效，例如99%有效1%無效，當然有部分藥廠係連啲數據都唔敢見人。呢個99比1係咩意思呢？最簡單嘅解釋就係，100個人打咗呢隻疫苗有99個人有效1個無效。但大家要留意，呢個99比1係以整體來講，即係以一班人為一個單位，並唔係個別來講。如果從一個人個別來講，疫苗對你有效的話你就係100%有效，如果疫苗對你無效你就係100%無效，所以個人而言係無99比1，只有100%有效或100%無效，而唔會出現喺你身上有99%有效1%無效嘅情況。如果你打疫苗嘅時候，係本著希望自己係嗰99%個人其中之一，咁嘅情況底下，你唔係講緊科學，你係講緊賭博。因為你只係希望搏一搏你係嗰99%分之1。

打咗好過唔打

跟住有人/政府就講，有效當然好，但無效都無壞啫，所以結論就係打咗好過唔打，但點解都有咁多人唔敢打。原因就係因為打疫苗係有副作用嘅，而因為隻疫苗太新太快面世大家都好驚唔知道有乜嘢有意想不到的副作用，尤其是有兩隻疫苗係講到明用新科技製造，好多副作用根本唔知道，即時嘅副作用當然會好快見到，但係好長遠嘅副作用好多時候幾年甚至乎幾十年之後先知道。科學數據唔多，到市民接種疫苗最後都係膽駁膽。

政府搬龍門為咗令到市民安心肯定打疫苗，就將個波交咗畀家庭醫生。叫大家到家庭醫生check check，問一問合唔合適打疫苗。事實上大家都知道，唔會有一位家庭醫生肯話畀你聽你既身體絕對適合打疫苗又或者話畀你聽你身體絕對唔適合打疫苗。因為班醫生並唔係傻仔。第一，隻疫苗本身對醫生嚟講都係新嘅，佢得到既資料可能同一般市民所得到嘅係一樣。第二，醫生對你嘅身體狀況其實唔係真係好了解。醫生無錯會有你嘅醫療紀錄，但係呢啲嘅紀錄都係以前嘅紀錄。如果佢要知道你今日嘅狀況醫生係要同你做全身檢查。但係大家都知道就算係全身檢查並唔係真係乜嘢都可以查晒出嚟。我哋嘅醫療檢查並唔係想象中咁先進。第三，家庭醫生並唔係傳染病學專家，其實佢對隻武肺同埋啲疫苗都的知識係一般般。所以家庭醫生死都唔會講你適唔適合打疫苗。

好處大個壞處

後來政府推銷疫苗俗稱谷針，就宣傳打疫苗好處大個壞處。係呢個口號上面大家要好小心留意，所謂好處係指乜嘢，所謂壞處又係指乜嘢。疫苗嘅好處就係，係中招之後會減輕你嘅病徵即係冇咁辛苦，又或者減低死亡率。另外，有人講疫苗可以預防傳染。但對於武漢肺炎來講，打完疫苗可以預防傳染係唔成立，無說服力（有啲其他病毒的疫苗係可以做到預防傳染嘅，不過唔係武漢肺炎疫苗）。所以武漢肺炎嘅疫苗只有一個功能，就係中招後你冇咁辛苦或者冇咁易死。咁至於壞處呢？說係之前講嘅副作用又或者因為接種疫苗後產生嘅其他併發症，例如血管栓塞，科學家都無辦法完全證實。咁結果係合理嘅，因為時間實在太少啦。但問題就係，既然我哋冇辦法證明所有嘅壞處，我哋又憑乜嘢講好處大個壞處呢？好唔科學。

就我個人嚟講，我覺得用好處大個壞處呢個論據只有一個情況下可以成立。就係呢一刻你唔打疫苗下一秒鐘你會即死。喺呢種冇其他選擇嘅情況底下，我哋就會運用好處大個壞處去做決定。但我哋反觀武漢肺炎，其實唔打針係咪唔可以避免到感染呢？當然我哋有好多辦法可以避免感染。如果我哋避免到感染，咁又使乜介意中招之後會好辛苦呢？因為根本唔會中招。事實上好多市民亦都明白到， 戴口罩，勤洗手，避免人與人之間嘅接觸，就已經足夠解決咗中招嘅機會。例如早期我哋發現老人家中左武漢肺炎死亡率極高，但係老人家並唔係傻嘅，當佢哋知道呢個事實之後，個個匿喺屋企唔出街，根本冇中招嘅機會，老人死亡率跟住大大下降。

最先打到嘅就係最好嘅疫苗

事情發展到市面上有幾種疫苗，當然有啲好啲有啲差啲，好啲嘅大把人去打，打到冇得打，差啲嘅就留番曬喺度都冇人打。於是乎政府既口號又改變，最先打到嘅疫苗就係最好嘅疫苗。聽落都知道好白痴啦。既然幾種疫苗本身都有優劣，咁點會最先打嗰支就係最好呢？

當然政府最想講嘅係，渣渣地嘅都係疫苗，都有一定嘅保護。但係重點都係之前所講嘅，如果我可以小心預防感染，又使乜去趕住去打支渣渣地既疫苗呢？市民大可以慢慢耐心等待到最好嗰支有貨先至去打。

唔打疫苗冇公德心

好啦市民真係去等，唔打住，啲人又話你冇公德心啦。論據係，因為你唔打疫苗你會將啲病毒傳畀人哋。但係事實上個道理係，第一，你唔中招有點嘢畀人呢，第二，打咗疫苗都會中招㗎，都會嘢畀其他人。所以會唔會中招同埋會唔會嘢畀其他人，打唔打疫苗係冇關，而係會同個人操守有關係。我見過好多人以為打完疫苗就天下無敵口罩都唔帶，周圍約人出去玩。我覺得呢啲先係唔負責任冇公德心。佢哋好似唔記得咗，疫苗唔係氣牆唔係金鐘罩。

唔打疫苗要自費醫療

仲有啲人/政府講，唔打疫苗嘅如果中咗招要自費醫療，因為市民大眾係唔應該負擔呢一班人嘅醫療費用。如果呢個講法係成立嘅話， 基本上所有醫療系統會即時崩潰。因為運用同一個道理我哋可以問以下嘅問題，因為吸煙而引致其他身體問題係唔係可以要佢自費醫療？因為貪食引致肥胖所引致身體出現問題係唔係可以要佢哋自費醫療？喜歡玩高危遊戲引致身體受傷係唔係可以要求佢哋自費醫療？宅男低頭族長期唔做運動身體出現問題係唔係可以要求佢哋自費醫療？如此類推。如果政府解答唔到呢類嘅問題，佢哋就唔應該問冇打疫苗嘅人收返醫療費用。

唔打疫苗會失業

谷針最後絕招。唔打針冇得出街食飯，唔打針冇得去睇戲，唔打針冇得去參加聚會，唔打針冇得去老人院探阿媽探阿爸，最後，唔打針會失業。而最重要嘅係，打咗針嘅人會繼續中招繼續傳染。咁點解唔打針但係冇感染亦都冇傳染畀其他人要受到懲罰呢？而打咗針但係感染左右傳染畀人嘅點解唔使受罰呢？

My Body my control

好啦政府去到咁野蠻。市民唯有上街大叫My Body my control，I have freedom。

我嘅文章唔係主張叫大家唔打疫苗，我只係希望大家理性對去面對武漢肺炎同埋疫苗。如果人人唔自律，唔檢點，你打乜嘢疫苗都冇用。