前塵往事：潘小鳳

在FB上看到一個名字：潘小鳳。這個名字很熟，對啊，是我小學的同學。

因為我們身高差不多，所以在班上潘小鳳坐在我隔離。我們交情都幾好，有傾有講，借功課抄，算係唔錯。但小息就各自搵食（玩），始終男仔唔同女仔玩，女仔唔同男仔玩係小學規矩。

潘小鳳令我最印象深刻係：佢係一個大美人（小學應該叫小美人）。當然係全班最靚（小學生標準）。點靚，一個字講晒：白，係白裡透紅。唔明點解佢都出去操場玩但就一啲都晒唔黑，我就一舊灰佢就一片雪，真離奇。

小學升中，大家被派去唔同既學校，我唔知佢去邊間讀，始終只係小學生，唔識得問保持聯絡，或者我就係個咁既人，傻下傻下唔想明日事。咁就失聯了。但到中六那年，我就係租唱片鋪見到佢。佢係租唱片鋪打工，係呀，以前唱片有得租家，唔係邊有咁多錢聽歌。

當時，佢一樣咁靚，一樣笑得好甜。但係我當時就群埋一班麻甩仔玩，日日掛住聽歌吹水。問世間情是何物？我一概唔知，亦唔好攪我。最緊要係攪機（唱機）。幾個月後，佢就唔係度做。見返佢後我無問佢攞電話（全無動機），所以又失聯了。

講返FB上面既潘小鳳，人大了就懂得要聯系，我就message佢確認一下係咪自己小學同學。好可惜唔係。潘小鳳呢個名咁冷門都有同名同姓。