你試過決鬥味？
三劍俠，你地可能聽過。不過三劍俠係西人野，中國呢？就有三個臭皮丈。
我小學時，小二小三小四咁上下，我就係三劍俠其中一人。另外仲有兩個，一個係女劍俠林林，一個係男劍俠金金，而我係川川。係！我地係咁叫既。小朋友丫嘛，唔係咁叫唔通叫先生小姐？
我地三劍俠直頭黐到分唔到。同班同學，坐埋一齊，一齊上堂傾偈，一齊被罰，一齊坐無影櫈，一齊被打手板，小息時一齊玩。放學後各自歸家，林林住北角，我同金金住灣仔仲好近，因此放學後我仲可以同金金玩。
小孩子玩乜？係當時咁無物質享受既社會，咪玩走來走去。兵捉賊，僕呢呢，全部都係體能活動。因此，我地d體能超fit。林林雖然係女仔，但佢跑起上黎一d都唔輸比d男仔。玩兵賊時如果我地係賊就一定無得輸。因為我地每次去監獄救人必定成功，細細粒走得快，d高班都比我地比下去。
我地結義金蘭真係好到不得了，一個人既事就係三個人既事。
最後，真係發生事。
話說有日，林林同我地講，隔離班有個姓李既人想打林林，唔記得為乜。咁！當然唔可以。加上我地係三劍俠，一人有難，三人整上。
話時話，我地真係好高B。人家想打林林，我地決定先發制人。係點？向佢下戰書挑戰。橋段老套但真係做戲咁做。你可想而知以前d細路係幾咁單純。加埋d電視係幾咁毒！不過我地真係明刀明搶絕不陰濕。大俠風範。
但係我地又真係好精，話決鬥姐都怕死家嘛。所以我地係下戰書之前先幫對手做咗個詳細分析。小三四來講，我地真係好勁。
我地收集資料之後（主要係林林收集），我地知道李同學最出名係李三腳。李三腳？係啊，係李小龍既李三腳。個陣時李小龍好hit。我地深信李同學識使出李三腳仲好勁。
我地開始頭疼。李三腳咁勁，我地輸硬。但係走頭又好衰仔，話晒我地係三劍俠，輕功第一（跑步）。無理由比人蝦上門唔打過就走頭。
我地唯有死死地氣想法子去破解李三腳。皇天不負苦心人，比我地唸到。人家可以連環三腳踢得好快，快到好似接住咁，要破解佢只有一招。就係一於舉起隻手擋唔好縮手。原理好簡單，佢連續踢三腳，無論係幾快都好，每一腳都要回一回，我地隻手唔縮，咁積係一定擋到。但係齋擋唔係辦法，都要攻擊先至贏。無傷肝，我地仲有兩個人，其他兩個上咪得羅。（小三四唸到咁多野，真係有軍事天份，不過好似係打交天份多Ｄ）
戰略定好，林林就去下戰書。（其實我依家覺得佢兩個有d搵我笨，為乜我要係中間擋佢地係邊邊打？咁我咪即係肉盾？明明金金肥d加嘛！仲有，件事明明係林林野出來，係都係佢企中間啦！Anyway，都決定咗，就係咁啦。）
某年某月某日某時某地點，決鬥開始。丫，抵得佢丫，李同學竟然帶咗兩個女同學陪佢來，擺明演野，以為自己sure win。
決鬥只係last咗幾秒，最多廿秒。（決鬥過程實在殘忍，不錄，以免被列為三級出唔到街）
李三腳我地睇唔到，我淨係衝前抓，其他兩個一齊上。結果，李同學輸得好難睇，難睇係因為佢塊面多咗幾痕，真係好難睇，因為係人都睇到個幾條痕。我地三個上，李同學一個上兩個打氣，加上我地有事前部署，佢邊有得贏？（呢個故事教訓我地，有準備係好緊要）
因為李同學實在輸得好＂難睇＂，最後驚動咗校方。唔知係李同學屋企報定係佢個兩個好姊妹報，總之就係有人報咗比學校知。
結果，竟然係我要見校長，淨係我要，林林金金佢地唔使。我估因為我企中間，加上李同學咁難睇塊面係我抓出來。（我懷疑林林同金金有無打到佢？因為件事好似攪到係我同李同學既私人因怨而佢兩個無份又或者係幫我打氣咁）
天呀！有無攪錯？要個小三學生見校長？你知唔知係七十年代頭要見校長係幾咁大件事？老師已經可以罰你坐無影櫈，鋼尺打手打屁股，罰抄，扭耳仔。校長咪可以滕撞，火燒，落毒，凌遲？
我已經唔記得見校長時佢講過乜，我淨係記得原來校長係女人（我以為係校長都係男人，加上我記得校長係一個姓黃既男人，唔知點解而家變咗個女人）。當時，我好鎮定，係又震又要扮定。係咁震定既情況底下，校長講乜我又點會記得。見完校長我有一個結論：見校長好過見班主任，因為校長始終都係施文人唔會體罰，只佢只係係我本手冊扣咗２分定係５分。老實講，我平時上堂多咀講野，加加埋埋都唔只扣２或５分。見校長真好。
之後既事情我真係好想林林同金金同我一同分享，返到屋企我比老豆打到飛起。佢既級數係班主任以上。
第二日返學，奇怪的事情發生，我撞到李同學同佢塊疤痕面。但佢竟然同我笑？我只好陪笑。返到班房我同林林金金講，大家都唔知點解，但係我地都問咗個問題，我地為乜要同佢打交？之前我地根本唔識佢又無牙齒印。係羅，為乜要打交？我個５分咪白扣？
而家竟然變成不打不相識，真係武俠片橋段。
去到小五，我地三劍俠分咗班。而林林好似去咗第二間學校（唔知佢父母係咪認為我地間學校有壞份子因此幫佢轉校）。細路就係咁，分咗班見唔到面就無聯絡。
三劍俠從此絕跡江湖。（林麗霞郭偉金）
No comments:
Post a Comment