貧者越貧，富者越富

近來喜歡去二手店，主要是尋寶，係呀去搵舊野。我唔會去古董店，我認為被騙的可能性係99％，所以我去救世軍既二手店，所謂尋寶唔係搵古董，只不過搵一D還新正又啱用既野，為了增加成功機會我會駕車去到唔同地區去尋尋。

估唔到係尋寶之餘比我睇到一個社會現象。貧者越貧，富者越富。

之前講，為咗增加機會，我會去唔同地區既救世軍二手店。其實雖然地點不同，但物品款式參唔多，何解？其實捐出來既野大部分都係D老人家死咗，家人無地方處置D又舊又唔多值錢既舊物所以捐贈出來。所以大部分都係D四五六十年代既野。

講返社會現象。同一類形物品，係唔同區個價錢相差好大。係有錢區，二手貨比窮區平，係平。咁咪有錢人買到平野，而窮人買貴野？

想了一陣，我就明。係有錢區，二手野無乜買，所以就要用平夾賤價吸引人買。但係窮區，大部分人會先去二手店搵，搵唔到先買新貨。咁即係話只要平過新貨就會有人有興建，所以價錢會高好多。

我而家學識，只會去有錢區既二手店尋寶。可憐窮人只能活在他們的圈子裡。

權力的來源

廿多年前, 當時是哲學發燒友, 曾經同同事討論生存權利事宜. 佢支持動物生存權利, 所以人類不應該及不可以剝奪其他生物的生存, 如隨意殺害其他生物. 簡單地講就係眾生平等. (btw, 我同佢都係食素)

我當時極衰, 問咗佢一條問題, 如果眾生都有生存權, 那麼一旦有人違反, 邊個會 take action, 對負/懲罰那個人?

我再舉例, 如果你講我們有乜乜權, 例如言論自由, 咁國家會保障你, 如果有人剝奪你既言論權利, 你可以要求國家保護, 保障你呢個權利繼續發言.

一個權利必須背後有一個有力量既單位去保障權利的行使, 否則就係得個吹字. 沒有力量單位撐住, 有乜事起上來, 咪又係森林定律 !

同事啞口, 因為所謂眾生生存權, 千百年來事實都話比我地知, 係森林定律, 邊有保障? 眾生生存權係一個空話, 因為無力量單位執法.

引用現在香港的情況, 香港人依賴基本法, 那種依賴已經去到天真的地步. 因為, 基本法, 香港市民的權力來源, 它本身是沒有權力的, 而它本身係再有其權力來源, 誰可以解釋基本法誰就是基本法的權力的來源. 完全依賴基本法等同完全依賴人大, 中央, 中共. 香港市民, 你真的完全依賴中共嗎?

自我

媽媽教導孩子不要自我，就講，
以前既人一路都以為太陽圍住地球轉，後來先發現原來係地球圍住太陽轉。 
小孩回：我咪係太陽囉

燒火爐的啟示

現在屋企有個燒柴火爐。但係起爐燒柴並不容易，多嘗試就明白個中道理。

如果你以為用報紙起爐燒大柴，經驗所得，你唔使指意起到爐。

起木柴爐既方法係先用報紙燒幼條柴。當幼條柴燒起就加大柴去燒。一層一層燒落起，咁個火爐就起得靚，火力夠。

放火既嘢，一理通百理明。人間放火亦是如是。想細火燒大柴係唔可能。要成功，先用細火燒中柴，再由中柴燒大柴，一層層上就可以成功，燒得好靚。

講明白一些，想要上層旭必須靠中層，想旭中層要靠下層。下層很難直接攪到上層。戰略就係咁。

戰爭最可怕是

戰爭最可怕的是：戰場是在你的家園上。

情婦，妻子，知己

做人情婦最易，做人妻子不難，做人知己最不容易。
情婦，你肯就一定得。妻子，你忍就一定得。

知己呢？士為知幾者死，呢個世界，睇新聞，有幾多人"有"知己而死？

真係知己難求呀

自由的代價

籠中的動物，脫離了籠子就是自由。想要做什麼，去什麼地方也可以。但牠要自行尋找食物，面對被捕殺，面對種種危機。在籠子裡，牠不旦得到主人的保護，更可獲得食物。

這就是自由的代價。

現實中，大部分人都希望得到自由同時又要保護。你係唔係傻家！！！

現今世代，事實上有很多這類"兩樣都要晒"的人。事實上，佢哋實係好傻。

用石頭掟人

用石頭掟壞人的成本最低。

在沒有很大的負出（一塊執起來的石頭）同時可提昇自己的人格。

如果是掟錯也有一大班人陪你一起錯，斷唔會算到你的頭上，正所謂個個都錯即係無人要負責任。

借人上位

借人膊頭上位最易不過，天下之大，每時每刻都有那麼多不平事。抽水，隨時都可以。

抽錯水？真係抵死無得救。

佛教治國

佛教治國

曾經, 我認為佛教治國係無可能. 一個出世既宗教又點可以治理一個國家? 最後咪人人唔做野等乞食? 國勢又點會蒸蒸日上?

我的想法出現錯誤. 錯誤在於我用現今各國的治國標準 (搵大錢) 去考慮佛教治國. 

我不知佛教是否可以治國, 但我知道一個國家可以不把經濟發展 (搵大錢) 成為國策第一位. 無錯, 可能係會落後 (可能, 或者一D都唔落後), 但唔代表生存不到, 或者人民不快樂.

我不認同

這個世界沒有"對"與"錯", 只有"我認同的"與"我不認同的"

例句: 你這樣做是錯的.
重組: 你這樣做我不認同.

看到分別嗎?

世界是客觀的世界, 但人去演釋這個世界卻是主觀的. 在主觀底下, 我看不到"客觀的對與錯". 另一方面, 當然亦沒有所謂"客觀的我認同和我不認同".

日出日落是一個客觀事實, 所以不涉及對與錯, 亦不存在認同與否. 人事呢? 既然不客觀, 就只有"我低下的對與錯", 亦即是"我認同與否".

以後, 鬧交時就一清二楚, 不要再指責對方"錯", 而只說句"我不認同你的". 看來, 鬧交越來越沒味道.

人類的工作

人世間, 是一個不完美的人間.

人類的工作是作小修小補去使到這個人間能繼續發揮其功能.

熟手老師父, 他們會把事情做得近乎完美, 使這個人間看似完美. 但新手卻只能保持功能罷了, 還有可能把事情弄穢.

起碼的三元思考

我將“成敗”，“輸贏”定為二元思考。

那麼，這個世界絕不是二元世界。這個世界是起碼三元世界，即事件與事件是連結著，隨著時間的流動，事件與事件是不斷產生變化。

如果用二元論解釋這個世界，你一世都不會明白這個世界，世事。

多采多姿的世界

世界之所以多采多姿，是因為性格而非沒有規則。

人生與畫

兒童是蠟筆
少年是素描
成年是油畫
中年是水彩
老年是水墨

腦退化

思覺失調是個很好的名字, 事實上是精神分裂. 
腦退化是另一個很好的名字, 事實上是精神病.

前塵往事之中秋出千

今日中秋，想起小時候既一件事

當時，應該係小三咁上下。話說有間福利機構（好似係聖雅各福群會）攪咗個中秋花燈製作比賽。我同大家姐都有參加。

當然，以我咁蠢既人又邊識做花燈。BTW，我家姐都唔得，嘿，往佢重覺得佢好有藝術天份。

結果？結果係我老豆出手，做咗兩個一模一樣巴燈籠比我同我家姐去比賽。係一模一樣，可能我老豆淨係識得做呢一款燈籠。

比賽結果？結果係我地都贏咗。唔記得係二三定三四。總之有獎。

事後唸返都覺大會幾兒戲。明明係一模一樣，傻既都知道係出貓。加埋，一定係請槍，咁都有獎？呢個世界真係丫。

Anyway, 攞獎時真係好開心，家姐都開心。多謝老豆，中秋節快樂。

簡單的事情

簡單的事情並不悶, 簡單可以很神, 可以是藝術

有 heart

好多時我地都要求人做事要有 heart. 查實乜嘢叫做有 heart? 點樣知道個人有 heart 定無 heart?

近來想到, 如果做人既工作, 做完後你會有種幫咗人既感覺, 咁你就算有 heart. 如果你做完覺得只係辦咗件事, 咁就係無 heart.

有 heart 係一種感覺, 一種又內至外既感覺. 不單只係完成, 而加埋有DD徫大既感覺.

投票

投票
其實唔係投參選人，而係投市民質素及決心