另一個我

曾經唔知係邊度聽到一個心理學既現象。小孩子係會自我精神上分裂一個自己同自己玩，同自己傾偈。所以，有時我地見到小孩子自言自語就係咁解。當然，呢個都係恐怖片既好題材。

我細細個時，我唔知我有無自言自語，但係有一樣野我係好記得既。我記得我細個時，我係好相信係呢個宇宙既唔知邊度既一個星球上（細細個既我都幾科幻），有著同一個我存在（嘩！平衡空間概念）。雖然我地活在不同星球，但係，呢個另一個我同我share咗我既能力（能量轉送，互相轉移）。而另一個我係個星球上係好辛苦，因為？因為個個星球正在打仗，當然，另一個我都係度打緊仗，好危險，好辛苦。我試過係夢中去過佢個星球，見過佢，同佢傾過偈。我知佢好辛苦，好危險。

結果呢？結果查實好簡單。因為我地係 share 咗能力，所以，係地球既我要好好休息，瞓多Ｄ覺，補充體力。咁，佢係另一個星球既我就有氣有力繼續打仗。

就係咁多。