兩隻眼，兩雙耳，兩個鼻窿，一個口

 小時侯常問一個問題：為何人有兩隻眼，兩隻耳，兩個鼻窿，一個口？

通常的答案是很直接簡單：因為上天/上帝做定一個士啤（後備）的給你，萬一你無咗一個都有一個補上。就以你無咗一隻眼都重有一隻唔使盲，重可睇到嘢，耳仔也一樣。

至於鼻就因為會鼻塞，塞咗透唔到氣就會死，所以比多個你，你有無發現鼻塞通常塞一個窿唔會塞兩個窿。

至於口就唔識解釋點解得一個無士啤。或者兩個口兩把聲會太吵說話會太亂。

但我通常都會反駁，既然係士啤又點解唔係三隻眼或者兩對眼呢？

今天的我，看法已經不同。人類甚至乎一般動物有兩隻眼係因為只有用兩隻眼才看到三維空間（3D）。我們是活在三維空間的世界。一隻眼只看到平面而缺乏深度，生存成問題。

至於兩隻耳同樣是因為聲音是從四面八方來（立體的），用兩隻耳就能聽到聲音的來源。

至於鼻，我解唔到。或者真係怕塞所以有兩個窿。

而口，發音是向外的，沒需要理會是否三維發音。

另外，引發了一個問題，如果兩隻眼兩隻耳是用來處理三維空間，而人類及其他動物沒有進化出第三隻眼，是否意味根本上是沒有四維空間呢？