前塵往事之人係生嘢係死嘅

呢個前塵往事其實都係講我姑婆，八姑婆。

我記得我細細個同姑婆住既時候，我係要幫手做家務，除咗廚房之外，我樣樣都要幫手做。做家務當然會用到不同工具，垃圾鏟，掃把，毛巾，刷呀咁。細細個既我當然做得唔係咁好，尤其是用工具。姑婆通常就會同我講：嘢係死既，人係生既，你用佢而唔係佢用你。

道理好簡單，你只要純熟，你就可以用工具揮灑自如，而唔係吓吓受制於工具。

咁多年後，我想多咗。試問呢個世界，有乜嘢唔係工具？好似姑婆話齋，你唔純熟的話，就吓吓比佢哋控制住，而唔係你控制住佢哋。

工具，對於我而言，係可以包含一切，事，物，人，甚至去到國家都係咁話。所以話，係國家用緊你定係你用緊國家，就睇你對呢個工具使用上有幾純熟啦。

任何一件工具都有一定功能，亦有一定限制。清楚明白，多練習，你就可以揮灑自如，明白未？

最後，切記唔好同工具談戀愛。唔好因為用得多，好純熟就愛上咗件工具。工具就是工具，係用來達到你既目標既。正如錢一樣，搵錢係用來買你想買既野。自己都唔知自己想要乜？抵你搵一世錢都唔快樂。