Ｄ野係死既，人係生既

小時候，姑婆常常提醒我一個道理：Ｄ野係死既，人係生既。

個道理講乜？當然係唔同場合有唔同既解釋。

我細細個就認為：姑婆認為我唔識轉彎，呢，即係撞埋牆都唔識轉彎個隻。咁細路仔嘛，你估我係神童咩？又或者係老人精咩？人生閱歷有幾豐富先得假？大人叫你直行，邊度知可以轉彎。

當大個時個睇法又有唔同：個大既想法係你有幾能夠 master 你Ｄ工具或者身邊既環境。係講管理同控制。當然，最痴線係連另外一Ｄ生既野（其他人s）都想 master 埋。

再大Ｄ，即係而家：我就係想，萬事萬物都有一定法則，有其一定軌跡，人家（環境）唔如你意，你嬲佢做乜？環境係死既，你係生既，人家做自己跟著自己的軌跡行，唔如你意，你嬲都傻傻地。有時間，自己應該好好了解同明白世事同大道理。

唔知再老Ｄ，我又會點理解我姑婆呢一句說話。