前塵往事之八姑婆

要講我八姑婆，真係有排講。我自小就有一段時間同八姑婆一起生活，亦是我小時候最快樂時段之一。

八姑婆名叫李八，好明顯八姑婆係排第八。因為我未見過其他姑婆，因此，我叫八姑婆為姑婆就可以了。（我有個七姑婆，不過佢死咗好耐，係八姑婆比佢張相我睇加埋要年年拜七姑婆山，我先認識七姑婆，我想佢兩姐妹一定好好感情，否則我點只拜七姑婆一個）

姑婆係順德馬姐，即自梳女。唔知係乜？去維基睇睇你就明。

姑婆為乜要自梳唔嫁？當其時大部分馬姐都係為咗屋企，自梳後去搵錢照顧家庭。其實同而家既菲傭，印傭，泰傭無乜分別。不過，馬姐自梳就一世，現代傭人打幾年工後就回家享福去。自梳呢個表現，其實亦係對事頭的一種表態，一世唔嫁，即係唔會走，服侍事頭一家，最通常就係照顧事頭子女。所以，電影桃姐裡面就表現出大少（事頭個仔）同馬姐的關係，情同母子。而事頭婆亦非常尊重馬姐，因為人家放棄一生既幸福（不嫁）去照顧你家人。

我姑婆雖然係馬姐，但佢同一般馬姐唔同。人地馬姐入屋幫事頭打工，我姑婆自己係屋企辦私房菜。原來係好耐好耐以前已經有私房菜，私房菜絕對唔係潮流嘢。不過，係當時，聽到包伙食會多一Ｄ，由其係包寫字樓伙食，有機會再講。私房菜始終係有錢佬玩意，一般平民邊有機會享用呢？反之寫字樓包伙食就平民化好多。

為咗辦私房菜，姑婆間屋間隔好特別。第一，有一個好大既廚房，大個你間主人房。第二，當然廚房內百般煮食工具齊備，不過，你要留意，所謂百般工具其實都係好少。今時今日既煮食工具好古怪。鑊都九十幾隻，不同尺碼鑊鏟都不知幾多，還有不同的爐，碗碗碟碟，工具等等，多到你唔信。而我姑婆既廚房大但煮食工具非常之少。鑊得個一兩隻，鑊鏟好似得一隻（我記得係短柄的）。但大家要知，Ｄ嘢好唔好食唔係靠工具而係靠個廚既。我姑婆既級數當然係摘葉可傷人的高高手境界，又何需靠多多工具呢？

姑婆煮菜點好食，我唔寫啦，實在好食到筆墨難以形容。不過，就以佢客似雲來既客人來品嚐佢既順德手藝就知道一定唔野少。我記得當年有份文化月刊訪問我姑婆，以當時六七十年代來講，絕不野少，簡直架勢。我記得好多名人和明星都來過食，如胡風。

除了廚房就係一個很大很大的廳。我相信個廳係可以放三至四張大枱，一枱１２人。當然還有很多空間比客人傾偈，唔似得依家Ｄ酒樓食市，個座位空間迫死人，食都無心情食。

另外，除了廁所之外，就只有一間很小很小的房間。呢間房有一張上下格床，但全都放滿了衣服及物品。有床但不是睡房。既然不是睡房我同姑婆睡在那裡呢？就是大廳。當飲宴完畢後，我會幫手打掃大廳。清潔後，我會在地上鋪上麻將枱紙皮，再鋪上毛毯，睡在上面。每天如是，不論天冷天熱。

生活非常簡樸，但除了食一Ｄ都唔簡單，因為近廚得食嘛。一流大廚，是是旦旦煮都非常好味。舉個例，你地細個時乖，家人就會獎粒糖過你，已經係好好，好多人得粒冰糖。至於我，如果乖，係獎粒江瑤柱，唔係瑤柱碎，係大大粒的，我相信個size，係今時今日你都唔係咁昜買到。江瑤柱好襟食，一粒，慢慢答食你半日。

另外，如果個晚有飯局，通常都有好嘢食。鮑蔘翅肚絕無難道，我最記得成日有蛇羹食。不過，話時話，雖然生活於飲食天堂，但係我一Ｄ都唔識欣賞，實在太細，實在無要求，姑婆比乜食乜。

今次講咁多，下次再來。