剷平主義

有些人就是剷平主義，秦始皇就是其一。

當他沒法處理不同的意見（我相信這種人有平衡力問題），就玩統一，統一文字，統一思想。但他從來沒法享受到不同意見帶來的火花，生趣。

如果這個世界是個遊戲

從不同意見者甚至乎敵人身上，你獲得到知識。
從意見相同者身上，你獲得支持。

兩者都需要珍惜。

世界變

場景A:

甲: 真係一代不如一代
乙: 世界變姐, 係舊的食古不化

連李超人都話: 要個八十幾歲既人幫班後生仔做決定係好危險既

A: 任何地方, 如會議室, 茶餐廳

思想騎刧

越來越相信，歷史書上的一切都不一定真。就同宗教一樣，始終都係經過人手。

細節，歌功頌德，推卸責任的事情可以不理，但有些事情欲可作參考。

在中國，每到亂（戰亂，內亂，動亂）的時間，基本上所有管理階層接納法家，韓非等理論。

一到太平，就嗱嗱聲引入儒釋道。莫非法家韓非沒有處理太平之道，而儒釋道沒有處理亂的方法？

事實上，是所謂管理人是如何利用所謂思想或宗教去管治民眾。

本來，思想，宗教應該是放在第一位，指導著管理的方向。但事實是它們都變為一個管理工具。

孔子之所以得不到君王的重用不是他的思想不好，而只是生不逢時。

國家大事如此，公司亦是如此，家事也如此。那麼，真正的指導我們思想及行為的是什麼？

管理學問題

廚師要煮100人飯，其中一位客人要求食麵，因為他不吃飯。
結果：
因為兩種食物煮法不一樣，廚師打算用一半時間煮飯，用一半時間煮麵。

但廚師一向煮飯不懂得煮麵
結果：
廚師唯有再分配時間，用一半時間去學煮麵，用四分一時間去煮飯，四分一時間去煮麵。

當然，剛剛學會煮麵不會煮得好，結果廚師再分配時間。
結果：
廚師打算用一半時間去學煮飯，用少過四分一時間去煮飯，用多過四分一時間去煮麵。

但鐵一般的事實是：
99人在等食飯，1人在等食麵

P.S. 以上時間只係估，但重點在邏輯上。

哲學家是這樣練成的

今早去到一間地痞麵包舖食早餐。舖細細，價錢平，野食ＯＫ。

一班阿叔已經在高談闊論，內容是介子應該帶係邊隻手？你一言，我一語，大家吹到頂峰。有Ｄ堅持功能論，有Ｄ堅持習俗，理論多多，建設少少。

看到這個情境，我忽然好似見到哲學大師蘇格拉底 。根據記載，阿蘇生朝朝無野做（查實佢係無業遊民，所有野都係佢老婆攪掂，最update係佢做過守城門門口。所以根據記載佢好怕佢老婆但係又唔敢飛佢，可能怕飛咗老婆之後連飯都無得食。加埋佢好醜，搵唔到小三），就去市集度，成班麻甩佬係度吹水，當然每天題目都唔同。吹吹下，就吸引埋Ｄ靚仔（好似阿里氐多德等）都聽佢地吹。後來靚仔阿里氐重要寫底Ｄ吹水內容變成哲學經典。

吹下吹下，個個麻甩佬變成哲學大師，重有門派。

麻甩佬真係好奇妙，時間重奇妙，用幾千年時間可以將班麻甩變成哲學大師。

大前題

好多時，我地都會用＂以乜乜為大前題＂，＂以乜乜為重＂既思考方法去處理討論，又或者去處理衝突。

但事實上，最大的大前題是自己，無論大家幾想乜乜係大前題，人既內心，好自然會將自己成為第一位。當我自己ＯＫ既時候，其他事情就可以成為大前題。

你又試下為咗公司，唔加你人工你＂內心＂嬲唔嬲？

想太多

老豆過身，從中都比到好多思考同啟發過我。

唔知係咪因為我既工作關係，定係我個人既性格，凡事，我都好似諗多咗，俗稱諗太多。

諗完自己個份，之後，又要諗埋人地個份，差Ｄ連唔關事既人個份都諗埋，可能諗重要諗埋對社會既 impact。

其實，我都會諗點解會諗多咗，其中一個原因係唔夠資料。事實上若果有足夠資料，重有乜野好諗。正所謂，事實擺在眼前，唔接受都要接受個事實，要諗就只有諗點回應。

唔夠資料去諗，就有好多估計，老實講，你可以估到自己係點，但你又邊會估到人地係點，再加上你會估人地點估你，又或者你估人地點估你估佢，真係沒完沒了，如果涉及多幾人，真係估來估去既大災難。陰謀論就係咁出咗。

跌落陰謀論，肯定你一世痛苦。

係資料不足既時候，最好唔係去估，而係去搜集有用資料，當你搵到既時候，咁，咪使再估。

就算你無法再搜集到進一步資料，你都唔係去估。而係用手上現有既資料去做一個決定，一個你可以實行到的決定，一個你願意承擔既決定。

＂莫忘初心，實事求事＂係好緊要。要估，你一世都估唔完，你能夠整理到你自己就已經好足夠。你可以承擔到多少就是了，不能就是不能。

多謝老豆，死咗都比咁多野過我諗。

燒香

燒香， 比人是一種迷信既嘢， 或者係一種宗教儀式。

但只要你試過有親人過世， 燒香， 絕不是上述所想的事情。那種對親人的思念， 就由輕煙徐徐送到他那裡去。

前塵往事之成日比老豆點

我雖然唔算絕頂聰明， 但都算聰明絕頂。但係， 咁多年來， 我都一直都比老豆點。

又話考試考三名之內可以買大型Cassette機, 又話考完會考可以比我去大陸旅行(自由行), 又話賣間樓過我....多不勝數。

頂, 全部都係搵我笨。

不過， 我再無嬲我老豆。老豆都可以信， 豬乸都會上樹。

查實， 我上咗高中就知道老豆成日搵我笨。不過唔知點解， 都係繼續比佢搵笨。

搵我笨已經成為老豆既習慣， 我被搵笨都係習慣。

都慣晒， 搵唔搵， 笨唔笨都無所謂。話晒一世人兩仔爺， 有今生無來世。當大家熹戲下咪算羅。最難過係你想佢搵你笨都唔可以

掛念阿爸

很掛念我阿爸
不知他現在如何, 我指佢個靈魂

我無後悔同老豆以前發生既一切， 包括頂佢個D。因為， 無喜與悲就唔係我同我老豆。

很排念阿爸， 是從心裡排念， 真的， 同用腦既掛念係唔同。每次想起阿爸， 個心就有反應。

前塵往事之原來我好識扭計

我諗應該係小學生既事，因為上到中學我都唔啋我老豆。

細個時，好多野想買，當然係唔等使野，但細路仔真係唔知點開口（大咗中學後就一句＂阿爸我要買乜乜物物＂攪掂）。咁細路既我又點好呢？

多年經驗，我知道老豆每晚通常都係晚上９點度返到屋企，佢係上環返工，日日都係搭叮叮。於是乎＂聰明既我就會８點半到咁上下去到電車站等老豆放工。

當然係無事先通知，個老豆見到個仔去接佢放工就好開心。於是乎就會有宵夜食。嘿！奸計成功！有時要買野就會拖老豆去買，通常係新中華百貨公司。文具呀，衫褲鞋襪呀。有時係玩具。

呢招真係勁，次次都成功。嘿！

講扭計我都唔野少。

是掛念

那個感覺不是＂唔捨得＂而是＂很掛念＂。

腦內會一陣時想起一些片段，自己想到還寄得的片段，但害怕會忘記了所以淨下來的片段。

念父

二零一六年，香港四月六日早上四時五十四分。我父離世。

詞彙騎刧

詞彙本身是中性的，但現時有些詞彙已經染上了色彩，如宗教。

每次我想用＂感恩＂呢個詞彙，我都會停一停或放棄使用，因為，感思好像已經被基督教騎刧了，只有基督徒先會口裡不停說＂感恩＂。為免被人誤會我係基督徒，都係少說＂感恩＂為炒。

另外，如＂慈悲＂就帶有佛教色彩。當然，亦有指出＂慈悲＂與＂感恩＂不同。因為，＂慈悲＂是由佛都創出來的，而＂感恩＂是借用的。使用上很不同，在一般人生活上是絕少使用沒有佛教意味的＂慈悲＂。但感恩的＂恩＂在一般人心中絕不是指上帝或耶穌。

無論如果，越多詞彙被騎刧，越難找到合適的字句去形容心中所想。真係有口難言。